طبخة 3 ~ بيجو =) شوربة الدجاج بالذرة ، مكرونة بالقشطة

بسم الله الرحمن الرحيم

بيجو دي عشان صحبتي و مرة ثانية لحد يقول سوي طبخة باسمي << تحسوها اتورطت 😛

ملاحظين انها صارت طبختين في اليوم بدال طبخة وحدة !؟

ضميري ما يسمح لي أطبخ شيء واحد بس << طباخة بالفطرة 😛

اطلع برا صح ؟ P:

شوربة الدجاج بالذرة << أليييييييمة ! =”)

المكونات :-

• نص صحن أو أقل من صدور الدجاج
• نص بصلة كبيرة أو وحدة صغيرة
• 5 ملاعق ذرة أو أكثر حسب المزاج
• 3 و نص ملاعق نشا << النص دا عباطة بس 😛
• 6 كاسات موية
• شوية زيت
• نص معكب ماجي
• بيضة
• ملح
• فلفل أسود

~::~

الطريقة :-

• نقطع البصل قطع صغيرة جدا و نقطع الدجاج مكعبات
• نحط شوية زيت في قدر على نار متوسطة و نحط البصل بعدين نحرك شوية
• نحط الدجاج و نصب الموية عليه و نخليه تقريبا ربع ساعة ( بعدها أنا صفيت الموية و حطيتها في قدر ثاني بعدين كملت بقية الخطوات بعد وضع الدجاج مرة ثانية في القدر الثاني بس مو لازم =/ << نتيجة عدم قراءة الوصفة كاملة قبل الشروع في الطبخ -_-” )
• نحط الماجي + النشا + الذرة + الملح + الفلفل الأسود و نحرك لمدة 5 دقايق تقريبا
• في صحن نفقس البيضة و “نخفقها” 😛 بعدين نحطها عالشوربة ونحرك بسرعة

اذا شفتوها مرة ثقيلة زودوا موية =)

بالهنا والشفا =)

الوصفة اللي استخدمتها ~ شوربة الدجاج بالذرة

~::~

مكرونة بالقشطة

المكونات :-

• نص كيس مكرونة [ اسطوانية ]
• نص صحن من صدور الدجاج ( اللي باقية من حقت الشوربة ض1 )
• علبة قشطة التاج سادة ، مو تروحوا تجيبولي بالعسل 😛 << يا دمك يا شيخة
• مكعب ماجي ( انا حطيت مكعبين بسبب الوصفة الـ@#% )
• فص ثوم مدقوق ولا مدري ايش هو .. انا استعملت نص ملعقة صغيرة من بودرة الثوم
• ملح
• شوية زيت
• ملعقة أو 2 جبنة سايلة اذا تحبوا تحطوها مع القشطة مرة تطلع طعمة =”)

~::~

الطريقة :-

• نسلق المكرونة و ذلك بوضعها في قدر و نغطيها بالموية ثم نسيبها الين تستوي
• نصفيها و نحطها على جنب و نروح نقطع الدجاج برضو مكعبات :سيكو:
• نحط شوية زيت في صينية على نار متوسطة ، بعد ما يسخن نحط الثوم + الماجي
• نحط الدجاج عالزيت و نحرك كدا الين يستوي نوعا ما 😛
• نحط المكرونة عالدجاج و الشسمه في الصينية و نحرك
• نضيف لهم القشطة و الجبنة و نحرك ، نحرك ثم خلاص ^^

في الوصفة كان فيه بقدونس بس ما اتوفر عندي فسحبت عليه كح كح

بالعافية =)

الوصفة اللي استخدمتها ~ مكرونة بالقشطة لذيييييييذة

~::~

امم الوصفات ترا تلخبط فأحسن لكم اسمعوا كلام قلبكم 😛

انا اليوم مرررة اتورطت بعدين الحمدلله كله صار تمام

زي ما قلت لكم أمس لا تنسوا تقروا كل الوصفة بعدين تطبخوا =$

أمس و قبله مو مرة عجبني الأكل بس اليوم آآه =”)

ألقاكم بكرا بإذن الله ..